---
title: "A po e lënë njerëzit Google-in për ChatGPT-në? Ja të dhënat"
description: "Sa vizita sjellin ChatGPT dhe AI Overviews, si i zgjedhin burimet, çfarë nuk ka efekt të provuar dhe çfarë duhet të bëjë një biznes i vogël, me radhë."
url: "https://sajdoko.al/blog/a-po-e-lene-njerezit-google-in-per-chatgpt/"
language: "sq"
content_signal: "ai-train=no, search=yes, ai-input=yes"
---
# A po e lënë njerëzit Google-in për ChatGPT-në? Çfarë thonë të dhënat

 15 nëntor 2026·16 minuta lexim·[SEO](https://sajdoko.al/blog/category/wordpress-sq/seo-sq/)     

Bizneset dëgjojnë sot dy gjëra të kundërta përsa i përket vizitave në faqet web. Njëra thotë se Google po e humbet vëmëndjen dhe klientët po pyesin gjithnjë e më shumë ChatGPT-në. Tjetra thotë se kërkimi me AI është zhurmë e kotë dhe nuk ka pse të ndryshojë asgjë. Ne lexuam studimet origjinale dhe dokumentacionin zyrtar të Google, OpenAI, Anthropic, Perplexity dhe Cloudflare, për të parë çfarë mund të mbështetet me të dhëna.

 

Shkurt: njerëzit i përdorin asistentët AI, përmbledhjet me AI i ulin klikimet, dhe vizitat që asistentët u dërgojnë faqeve mbeten një pjesë shumë e vogël e trafikut. Pjesa më e madhe e punës që e bën një biznes të dukshëm në përgjigjet e AI është e njëjta punë që e bën të dukshëm në Google. Disa gjëra që shiten si “optimizim për AI” nuk kanë asnjë efekt të matur.

 

Çdo shifër më poshtë ka burimin dhe kufizimet e saj. Studimet matin gjëra të ndryshme, dhe shumica e keqkuptimeve në këtë fushë vijnë nga përzierja e tyre.

 

## Kërkimet bëhen ende në Google

 

Sipas vlerësimit të Similarweb, në tetor 2026 ChatGPT pati 6,05 miliardë vizita në faqen e vet, Gemini 2,64 miliardë, Claude 1,25 miliardë dhe Perplexity 88,3 milionë. Së bashku janë rreth 10 miliardë vizita. Google.com pati 88,44 miliardë në të njëjtin muaj. Këto janë vizita të modeluara në faqe interneti dhe nuk përfshijnë aplikacionet në celular, prandaj tregojnë përmasat, jo pjesën e tregut të kërkimit. [Similarweb: faqet më të vizituara](https://www.similarweb.com/blog/research/market-research/most-visited-websites/)

 Google.com pati gati nëntë herë më shumë vizita se katër asistentët së bashku. 

Mes motorëve tradicionalë të kërkimit, Statcounter e nxjerr Google me 91,05% në botë për tetorin 2026 dhe Bing me 4,80%. [Statcounter: pjesa e tregut e motorëve të kërkimit](https://gs.statcounter.com/search-engine-market-share/worldwide)

 

Një vizitë te një asistent nuk është domosdoshmërisht kërkim për një biznes. Njerëzit i përdorin këto mjete për të shkruar, përkthyer, përmbledhur dhe programuar. Për një biznes të vogël, përfundimi praktik është ky: Google mbetet burimi kryesor i vizitave nga kërkimi, kurse asistentët AI janë një kanal i dytë që po rritet krahas tij.

 

## Kur shfaqet një përmbledhje me AI, klikojnë më pak njerëz

 

Tri studime citohen më shpesh. Ato matin tri gjëra të ndryshme dhe nuk duhen bashkuar në një shifër të vetme.

  

| Studimi | Çfarë mati | Rezultati |
| :--- | :--- | :--- |
| Pew Research Center | 900 të rritur në SHBA, 68.879 kërkime në Google, mars 2025 | Një rezultat tradicional u klikua në 8% të vizitave me përmbledhje AI dhe në 15% pa të. Një lidhje brenda përmbledhjes u klikua në 1% të vizitave. |
| SparkToro dhe Similarweb | Të gjitha kërkimet në Google në SHBA, janar deri në prill 2026, panel në web | 68,01% e kërkimeve përfunduan pa asnjë klikim. Shifra përfshin çdo kërkim, me ose pa përmbledhje AI. |
| Seer Interactive | 53 marka, rreth 5,47 milionë kërkime të ndjekura | Në shkurt 2026, përqindja e klikimeve organike ishte 2,36% te kërkimet me AI Overview dhe 3,82% te ato pa të. |

  

Burimet: [Pew Research Center](https://www.pewresearch.org/short-reads/2025/07/21/google-users-are-less-likely-to-click-on-links-when-an-ai-summary-appears-in-the-results/), [SparkToro](https://sparktoro.com/blog/in-2026-less-than-one-third-of-google-searches-still-send-a-click/), [Seer Interactive](https://www.seerinteractive.com/insights/aio-impact-on-google-ctr-2026-update).

 Të dy studimet tregojnë të njëjtin drejtim, por matin gjëra të ndryshme. 

Drejtimi është i njëjtë në të tria: përmbledhja në krye të faqes u merr klikime rezultateve poshtë saj. Nuk ka një “përqindje pa klikim” që mund ta zbatoni për faqen tuaj. Ajo që mund të bëni është të shihni në Search Console cilat kërkime kanë humbur klikime ndërkohë që shfaqjet kanë mbetur po aq. Zakonisht janë pyetje informuese. Kërkimet e dikujt që është gati të rezervojë, të blejë ose të kërkojë një ofertë preken më pak, sepse përmbledhja nuk e bën dot rezervimin.

 

## Asistentët AI dërgojnë ende pak vizita

 

Semrush pa më shumë se 50.000 faqe interneti në 17 industri gjatë vitit 2025. Vizitat nga mjetet AI u rritën 66% brenda vitit dhe përsëri përbënin më pak se 0,15% të të gjitha vizitave në ato të dhëna. Kërkimi organik ishte shumë më i madh. [Semrush: studimi i kanaleve të trafikut](https://www.semrush.com/blog/traffic-channel-mix-study/)

 

A kthehen këta vizitorë në klientë më shpesh se të tjerët? Studimet nuk pajtohen, dhe arsyeja është se kë kanë matur:

 

- Amsive krahasoi 54 faqe për gjashtë muaj. Vizitat nga AI u kthyen në kërkesa ose blerje në 4,87% të rasteve, ato organike në 4,60%. Diferenca nuk ishte statistikisht domethënëse. [Amsive](https://www.amsive.com/insights/seo/does-llm-traffic-convert-better-than-organic-a-new-data-backed-study/)
- Marie Haynes analizoi 100 faqe dhe gjeti 13,8% për vizitat nga ChatGPT kundrejt 3,02% për Google organik. Në të njëjtat të dhëna, Google solli 96,5% të të gjitha konvertimeve të matura. [Marie Haynes](https://www.mariehaynes.com/geo-is-a-distraction/)
- Adobe mati shitësit me pakicë në SHBA në shtator 2026 dhe raportoi 90% më shumë blerje dhe 83% më shumë të ardhura për vizitë nga AI, krahasuar me të gjitha kanalet e tjera së bashku. [Adobe](https://business.adobe.com/blog/ai-traffic-higher-revenue-per-visit-retail-holiday)

 Kanali është i vogël, dhe studimet për konvertimin nuk pajtohen. 

Asnjë prej tyre nuk jep një shumëzues që mund ta merrni hua. Një klinikë, një agjenci turistike ose një kompani shërbimesh duhet t’i numërojë vetë kërkesat sipas burimit dhe të shohë sa vlejnë.

 

Edhe një gjetje ndihmon në planifikim. Ahrefs raportoi se mbi 80% e vizitave nga AI në faqen e vet mbërritën në kryefaqe, në faqet e produkteve dhe te mjetet falas, jo te artikujt e blogut. Janë të dhënat e një kompanie të vetme software-i, prandaj merreni si shembull. [Ahrefs](https://ahrefs.com/blog/ai-search-traffic-by-page-type-ahrefs/) Mësimi vlen edhe për një faqe të vogël: asistenti mund të lexojë një artikull, ndërsa vizitori mbërrin në kryefaqe ose në një faqe shërbimi. Të dyja duhet të jenë të mira dhe të lidhen me njëra-tjetrën.

 

## Si i zgjedhin asistentët burimet që citojnë

 

Të jesh në dhjetëshen e parë të Google për një kërkim nuk do të thotë se asistenti do t’ju citojë për të. Ahrefs krahasoi faqet e sakta që citojnë asistentët me faqet që renditen në Google për të njëjtën pyetje:

  

| Ku shfaqet përgjigjja | Faqet e cituara që janë edhe në dhjetëshen e parë të Google |
| :--- | :--- |
| ChatGPT | rreth 8% |
| Gemini | rreth 8% |
| Perplexity | 28,6% |
| Google AI Overviews | 37,1% |
| Claude | nuk ka shifër të krahasueshme të publikuar |

  

Burimet: [Ahrefs, 15.000 pyetje](https://ahrefs.com/blog/ai-search-overlap/) dhe [Ahrefs, 4 milionë citime në AI Overviews](https://ahrefs.com/blog/ai-overview-citations-top-10/). Te AI Overviews, edhe 26,2% e faqeve të cituara renditeshin mes vendit 11 dhe 100, kurse 36,7% ishin jashtë njëqindëshes së parë.

 Shumica e faqeve që citojnë asistentët nuk janë në dhjetëshen e parë të Google për të njëjtën pyetje. 

Një pjesë të shpjegimit e jep vetë Google. AI Overviews dhe AI Mode mund ta ndajnë një pyetje në disa kërkime të ngjashme dhe pastaj mbledhin faqe për secilin. Google e quan query fan-out. Një faqe mund të citohet sepse i përgjigjet mirë njërës nga këto pyetje të ngjashme, edhe kur nuk renditet për formulimin fillestar. [Google: veçoritë AI dhe faqja juaj](https://developers.google.com/search/docs/fundamentals/ai-optimization-guide)

 Shembull ilustrues: faqja e çmimeve citohet përmes një kërkimi të ngjashëm. 

Për faqen e një biznesi, kjo flet në favor të faqeve të plota të shërbimeve. Një faqe që tregon çfarë përfshin shërbimi, kujt i përshtatet, sa kushton ose nga çfarë varet çmimi, sa kohë kërkon dhe çfarë ndodh më pas, u përgjigjet shumë pyetjeve të ngjashme. Dhjetë faqe të holla që përsëritin të njëjtën fjalë kyçe nuk e bëjnë këtë.

 

## Çfarë shkon bashkë me përmendjen nga AI

 

Ahrefs studioi 10.000 marka në 260 milionë pyetje drejtuar AI dhe e publikoi studimin më 3 nëntor 2026. Markat që asistentët i përmendnin më shpesh përmendeshin më shpesh edhe gjetkë në internet: në diskutime në Reddit që renditen në kërkim (korrelacion 0,75), në faqe të tjera (0,70), në media (0,67), në YouTube (0,64) dhe në TikTok (0,60). [Ahrefs: llojet e përmendjeve](https://ahrefs.com/blog/mention-types-ai-visibility/)

 

Një studim më i hershëm i Ahrefs me 75.000 marka gjeti një lidhje të ngjashme me përmendjet në internet dhe lidhje shumë më të dobëta me vëllimin e kërkimeve për emrin e markës (0,352) dhe me treguesin e vet Domain Rating (0,266). Ai kampion përfshinte vetëm marka të njohura, prandaj thotë pak për një biznes të ri ose shumë të vogël. [Ahrefs: faktorët e dukshmërisë së markës](https://ahrefs.com/blog/ai-brand-visibility-correlations/)

 

Këto janë korrelacione. Nuk tregojnë se një përmendje më shumë sjell një rekomandim më shumë, dhe askush jashtë kompanive të AI nuk e di sa peshon secili faktor. Të blesh përmendje ose të postosh vlerësime të rreme mbi këtë bazë do të ishte gabim. Regjistrimet e vërteta në direktori dhe në shoqata profesionale, vlerësimet e ndershme dhe artikujt që shkruajnë të tjerët ia vlejnë gjithsesi, sepse i lexojnë edhe klientët.

 

## Robotët e kërkimit dhe robotët e trajnimit janë të ndarë

 

Çdo kompani AI përdor më shumë se një robot (crawler) për të lexuar faqet, dhe secili bën punë tjetër. Kjo është sjellje e dokumentuar dhe në përdorim.

  

| Kompania | Robotët për kërkim dhe përgjigje në çast | Roboti ose kontrolli për trajnimin e modeleve |
| :--- | :--- | :--- |
| OpenAI | OAI-SearchBot, ChatGPT-User | GPTBot |
| Anthropic | Claude-SearchBot, Claude-User | ClaudeBot |
| Perplexity | PerplexityBot, Perplexity-User | shihni dokumentacionin e tyre aktual |
| Google | Googlebot | Google-Extended (është kontroll, jo robot më vete) |

  

Burimet: [OpenAI](https://developers.openai.com/api/docs/bots), [Anthropic](https://support.claude.com/en/articles/8896518-does-anthropic-crawl-data-from-the-web-and-how-can-site-owners-block-the-crawler), [Perplexity](https://docs.perplexity.ai/docs/resources/perplexity-crawlers), [Google](https://developers.google.com/crawling/docs/crawlers-fetchers/google-common-crawlers).

 Po të bllokoni një robot kërkimi, dilni nga përgjigjet. Po të bllokoni një robot trajnimi, jo. 

Kjo do të thotë se mund ta lejoni ChatGPT-në t’i gjejë dhe t’i citojë faqet tuaja, ndërkohë që refuzoni përdorimin e tyre për trajnim:

 

```
User-agent: OAI-SearchBot
Allow: /

User-agent: GPTBot
Disallow: /
```

 

Ky është vetëm një shembull. Ruajini rregullat e tjera që keni dhe provojeni skedarin pasi ta publikoni. OpenAI thotë se një ndryshim mund të dojë rreth 24 orë që të shfaqet në kërkim. Google-Extended nuk ndikon në shfaqjen tuaj në Google Search ose në AI Overviews. Bllokimi i robotëve të trajnimit është vendim për mënyrën si përdoret përmbajtja juaj. Nuk e rrit dhe nuk e ul dukshmërinë tuaj në përgjigje.

 

Problemi më i shpeshtë është bllokimi pa dashje. Një plugin sigurie, një rregull i firewall-it ose një faqe verifikimi e CDN-së mund t’i kthejë gabim një roboti të ligjshëm kërkimi, ndërkohë që faqja duket në rregull në shfletues. Asnjë studim nuk tregon sa faqe biznesesh të vogla e kanë këtë problem, dhe kjo është një arsye për të kontrolluar tuajën.

 

## Çfarë nuk ka efekt të provuar

 

Disa mekanizma të rinj diskutohen sikur sjellin rekomandime. Dokumentacioni thotë tjetër gjë.

  

| Mekanizmi | Gjendja në 2026 | Për çfarë shërben |
| :--- | :--- | :--- |
| llms.txt | Konventë opsionale. Google deklaron se Search e injoron. | Një përmbledhje e faqes për mjetet që zgjedhin ta lexojnë |
| Content-Signal | Format i Cloudflare për të deklaruar si mund të përdoret përmbajtja | Rregulla për kërkimin, përdorimin nga AI dhe trajnimin. Nuk ndikon në renditje. |
| Preferenca e trajnimit AIPREF | Draft individual në IETF, jo standard i përfunduar | Deklarimi i preferencës për trajnim në mënyrë standarde |
| WebMCP | Provë (origin trial) në Chrome | U lejon agjentëve në shfletues të përdorin format dhe mjetet e faqes |
| JSON-LD i përgjithshëm | I vendosur për rezultatet e pasura | Përshkrimi i saktë i biznesit. Nuk është kërkesë e veçantë për AI. |

  

Burimet: [Google](https://developers.google.com/search/docs/fundamentals/ai-optimization-guide), [Cloudflare](https://developers.cloudflare.com/fundamentals/reference/markdown-for-agents/), [drafti në IETF](https://datatracker.ietf.org/doc/draft-kelley-aipref-training-preference-signal/), [Chrome](https://developer.chrome.com/blog/ai-webmcp-origin-trial).

 

Disa prej tyre i kemi publikuar në faqen tonë, sepse ndërtojmë mjete që mund t’i përdorin agjentët dhe duam ta dimë si sillen këto standarde në praktikë. Nuk i paraqesim si mënyrë për t’u rekomanduar, dhe duhet të tregoheni të kujdesshëm me këdo që e bën. Një protokoll mund të jetë i dobishëm pa ndryshuar se kush përmendet.

 

## Çfarë të bëni, me radhë

 

Të dhënat mbështesin një radhë të thjeshtë: bëjeni faqen të arritshme dhe të qartë, mbajeni biznesin të njëjtë kudo, pastaj ndërtoni reputacionin, pastaj ndiqni rezultatet.

 

**Dy javët e para**

 

1. Kontrolloni që faqet kryesore janë të indeksuara, hapen normalisht dhe nuk janë bllokuar nga robots.txt, nga një etiketë noindex ose nga firewall-i. Inspektimi i adresës në Search Console tregon çfarë sheh Google.
2. Vendosini faktet në HTML të thjeshtë që ngarkohet pa klikime: emri i biznesit, shërbimet, zonat që mbuloni, kualifikimet, çmimet ose nga çfarë varet çmimi, dhe si mund t’ju kontaktojnë.
3. Konfiguroni në Google Analytics ngjarjet për kërkesat dhe blerjet, dhe grupojini vizitat nga asistentët AI si burim më vete që t’i shihni.

 

**Muaji i parë**

 

1. Bëjini emrin, adresën dhe numrin e telefonit të njëjta në faqe, në Google Business Profile dhe në direktori.
2. Shkruani një faqe të plotë për çdo shërbim dhe çdo vendndodhje, me hollësitë që i duhen blerësit për të vendosur dhe me një mënyrë të qartë për të rezervuar ose për të pyetur.
3. Shtoni të dhëna të strukturuara të sakta për biznesin, shërbimet dhe shtegun e navigimit, aty ku kanë vend.
4. Kërkojuni vlerësime klientëve të vërtetë. Publikoni raste pune, kualifikime dhe fotografi tuajat.

 

**Nga muaji i dytë**

 

1. Përgjigjuni pyetjeve që bëjnë blerësit para se të telefonojnë: kostoja, kujt i përshtatet, procesi, alternativat.
2. Fitoni përmendje përmes kontributeve lokale dhe në industrinë tuaj, anëtarësimeve dhe publicitetit të vërtetë.
3. Një herë në muaj, bëjini çdo asistenti të njëjtat pyetje në gjuhën tuaj dhe shënoni cilat biznese rekomandon, cilat faqe citon dhe çfarë thotë gabim për ju.

 

Se çfarë përmban një faqe e plotë varet nga biznesi. Një klinike i duhen kualifikimet e mjekëve, faqe për çdo trajtim ku thuhet kujt i përshtatet, udhëzime për rezervimin dhe çmimet. Një agjencie turistike i duhen itinerari i çdo turi, kohëzgjatja, çfarë përfshihet, sezoni dhe kushtet e rezervimit e të rimbursimit. Një kompanie shërbimesh i duhen specializimi, procesi i punës, çfarë dorëzon, rastet e punës dhe mënyra si jepet oferta.

 

## Si ta matni

 

Google shtoi në Search Console një raport për AI gjeneruese në qershor 2026 dhe e shtriu në gjithë botën deri në fund të gushtit. Ai tregon shfaqjet dhe faqet që dalin në veçoritë AI. [Google Search Central](https://developers.google.com/search/blog/2026/06/gen-ai-performance-reports) Nuk tregon nëse dikush u bë klient, prandaj shoqërojeni me shifrat tuaja:

 

- **Shfaqje:** shfaqjet në raportin e Search Console.
- **Përmendje:** sa shpesh del biznesi juaj kur bëni pyetjet tuaja të përhershme, sipas asistentit dhe datës.
- **Citime:** cilat faqe tuajat lidhen dhe nëse ato lidhje hapen.
- **Vizita:** sesionet nga burimet AI në Analytics.
- **Kërkesa:** kërkesat, telefonatat dhe rezervimet nga ato sesione, dhe sa vlejnë.
- **Saktësi:** nëse asistenti i thotë saktë çmimet, adresën dhe shërbimet tuaja.

 

Përmendja, citimi dhe vizita janë tri rezultate të ndryshme. Një raport që i përzien do t’ju çojë në përfundime të gabuara.

 

## Ku hyn kjo në punën tonë

 

[Kontrolli ynë falas për gatishmërinë ndaj AI](https://sajdoko.al/gati-per-ai/) mbulon hapin e parë të listës më sipër: nëse asistentët dhe robotët e kërkimit i arrijnë faqet tuaja, nëse faktet bazë të biznesit lexohen, dhe cilët robotë lejon ose bllokon robots.txt-ja juaj. Standardet në zhvillim i shënon si të tilla dhe u jep pak pikë. Asnjë mjet, as yni, nuk garanton një rekomandim.

 

Pjesa tjetër është punë e zakonshme dhe e kujdesshme: faqe të qarta shërbimesh, të dhëna të njëjta të biznesit kudo dhe matje. Këtë mbulon [shërbimi ynë i SEO-s](https://sajdoko.al/sherbime/seo/). Nëse doni të dini ku ndodhet faqja juaj, bëni kontrollin dhe na dërgoni raportin.

 

## Pyetje të shpeshta

  A e ka zëvendësuar kërkimi me AI Google-in? 

Jo. Në tetor 2026 Google.com pati rreth 88 miliardë vizita, kundrejt rreth 10 miliardëve për ChatGPT, Gemini, Claude dhe Perplexity së bashku, dhe një pjesë e madhe e përdorimit të asistentëve nuk është kërkim. Asistentët AI janë një kanal shtesë që po rritet.

   A sjellin vizitorët nga ChatGPT më shumë kërkesa se ata nga Google? 

Varet nga faqja. Një studim nuk gjeti diferencë domethënëse, një tjetër gjeti diferencë të madhe në një kampion të zgjedhur, dhe një studim për shitjet me pakicë gjeti më shumë blerje krahasuar me të gjitha kanalet e tjera së bashku. Matini kërkesat tuaja sipas burimit para se të nxirrni përfundime.

   A më duhet një skedar llms.txt që të dal në përgjigjet e AI? 

Jo. Google deklaron se Search e injoron, dhe asnjë studim nuk tregon se ai i shton rekomandimet në asistentët e tjerë. Nuk bën dëm, por vjen pas indeksimit, faqeve të qarta të shërbimeve dhe të dhënave të njëjta të biznesit.

   A duhet t’i bllokoj robotët e AI? 

Vendosni veçmas për kërkimin dhe për trajnimin. Po të bllokoni një robot kërkimi si OAI-SearchBot, dilni nga përgjigjet e atij asistenti. Po të bllokoni një robot trajnimi si GPTBot, vetëm refuzoni përdorimin e përmbajtjes për trajnim, dhe kjo nuk ndikon nëse ju citojnë.

   Si ta di nëse asistentët e rekomandojnë biznesin tim? 

Shkruani dhjetë deri në njëzet pyetje që do të bënte një klient, në gjuhën që do të përdorte. Bëjini çdo asistenti të njëjtat pyetje një herë në muaj dhe shënoni cilat biznese përmend, cilat faqe lidh dhe çdo fakt të gabuar për ju. Raporti i Search Console shton shfaqjet në veçoritë AI të Google.

   

- [SEO](https://sajdoko.al/blog/category/wordpress-sq/seo-sq/)

   

## Keni një projekt në mendje?

 

Na shkruani dhe përgjigjemi me një vlerësim konkret brenda një dite pune.

  [Kërkoni një ofertë →](https://sajdoko.al/kontakt/)     

## Lini një koment [Anulo](https://sajdoko.al/blog/a-po-e-lene-njerezit-google-in-per-chatgpt/?format=markdown#respond)

      

## Postime Së Fundi

- [A po e lënë njerëzit Google-in për ChatGPT-në? Çfarë thonë të dhënat](https://sajdoko.al/blog/a-po-e-lene-njerezit-google-in-per-chatgpt/)
- [Ridizenjimi i faqes: çfarë duhet të ruani për SEO-n para publikimit](https://sajdoko.al/blog/ridizenjimi-i-faqes-seo-lista-e-kontrollit/)
- [Softuer për menaxhimin e flotës: çfarë ju duhet përveç GPS-it?](https://sajdoko.al/blog/softuer-menaxhimi-flotes-pervec-gps/)
- [CRM me porosi apo platformë standarde SaaS: Llogaritja e kostove dhe efikasitetit për biznesin](https://sajdoko.al/blog/crm-me-porosi-apo-platforma-standarde-per-biznesin/)
- [Zhvillimi software nearshore në Shqipëri: Pse kompanitë evropiane po zgjedhin inxhinierët shqiptarë](https://sajdoko.al/blog/zhvillimi-software-nearshore-ne-shqiperi-avantazhet-e-tregut/)

## Komente Së Fundi

S’ka komente për shfaqje.